bAis 66:24
Mark 9
1Pa i atai la mang, “A atong momoli ta mulo, dingla o mulo ning mulo tur te, belot mulor mat, pa mulor oroi a matanitu ane God ir hanot taum ana rakrakai.”A palaona e Iesu i ries
(Mt 17:1-13; Lk 9:28-36)
2Ning diono na pukakiar ka rop, e Iesu i ben pas e Pita, Jems pa e Jon, pa i ben maskan pas ditol usaot ana mangir ning i tur kas kol. Pa ditol oroi a palaona e Iesu i ries. 3Anuna na kaenla i pil pa i kokok rakrakai kol, pa bel tik mite lapiu ir gos totoh pas ta kaen manglarning. 4Pa natola kakak a asasaer ditol oroi pas e Elaija pa e Moses dia hanot pa ditol warwara taum o e Iesu. 5Pa natola kakak a asasaer ditol matmataut kol pa e Pita bel i tasman asa ir atongi, pa i atai kama e Iesu mang, “Tena Asaer i wakak sur dalar kes kama te. Mitolar tol ir natola palturturup, takai anumi, takai ane Moses, pa takai ane Elaija.” 7Lamur a laukap i poroi alar pas la. Pa a elngen takai misaot na laukap i atongi mang, “Ine a Natuklik, a mang kol suri. Mulor longor tana.” 8Aiapiapka ditol gilam taltal, ika bel ma ditol oroi ulak tik, e Iesu sot kama kaning i tur taum on ditol.9Ning la han purum amon misaot ana mangir, e Iesu i sairas ditol sur gong ditol atai tar tik ana ututnala ne ditol ka oroi tari, tuk ana pukakiar ning a Nat a Barsan ir kamtur ulak kusun a minat. 10Ditol mur a warwara ning, pa ditol deken artalai ditol mang, “Asa momol a kamkamtur ulak kusun a minat?”
11Pa ditol deken e Iesu mang, “Asa kamkamna ning a tena asaerla tagun a Warkurai la atongi mang e Elaija ir hanot nigo?” 12I keles ditol mang, “A momolna ot, e Elaija ir hanot nigo pa ir atostos ulak a ututnala rop. Pa asa kamkamna ning di ka tumus tari ana Buk Tabu mang a Nat a Barsan ir kilang a galis a kankan pa bel dir mang suri? 13Pa ne ar atai tar mutol mang e Elaija ka hanot pas, pa la tol a toltol laulaula teteki arlar ana nunla nemnem, lar otning di ka tumus tari onoi ana Buk Tabu.”
E Iesu i kepsen a mot kusun a kaklik
(Mt 17:14-21; Lk 9:37-43)
14Ning e Iesu taum ana natol a kakak a asasaer la han purum tetek a kakak a asasaerla, la oroi a tnan kunum a taraila kaning la tur talilis pas la, pa a tena asaerla tagun a Warkurai kaning la arlak ana warwara taum ana kakak a asasaerla. 15Ning a tarai la oroi pas e Iesu, la kulkulan kol, pa la dun barati pa la gasgas pasi. 16Pa e Iesu i deken anuna kakak a asasaerla mang, “Asa ning mulo arlak na warwara onoi?” 17Ning a barsan miting na tinine taraila i kelesi mang, “Tena Asaer, a ben a natuk barsan tetek u, ning a mot i kas tar onoi pa bel i tolsot sur ir warwara. 18Ning a mot ne i sira umi, i sira migen purumi ting lapiu, pa a busa na pahana i sira purum, i arngingit pa a palaona i rakrakai. A nunung anum a kakak a asasaerla sur lar kepsen sen a mot kusuni, ika bel la tolsot.”19E Iesu i keles la mange, “Mulo a taun tarai ne, bel mulo tortorot! A ka kes kol tetek mulo. Nangse ma mulor tortorot? Mulor ben a kaklik ning tetek iau.” 20Pa la ben pasi tetek e Iesu. Ning a mot i oroi pas e Iesu, aiapiapka i migen purum tar a kaklik ning ting lapiu, pa i pele, pa i busa a pahana.
21Pa e Iesu i deken a taman a kaklik mang, “Nangse i turpasi?” Pa i kelesi mang, “I turpasi onoi ning ot i kaklik. 22Galis a pukakiar a mot i sira migen tari uting na iah pa uting na malum otleng sur ir umkoli. Ning ur tolsot sur ur kepsen a mot kusuni, ur maris miau, pa ur nangan miau.”
23E Iesu i atongi tana mang, “U ot! Esining i tortorot i tolsot pas a ututnala rop.” 24Pa a taman a kaklik i kukuk kapit mange, “A tortorot! Nangan iau ana nuk siklik tortorot.”
25Ning e Iesu i oroi a kunum a taraila ning la dun taum, i warwara rakrakai tetek a mot mang, “U a mot, a ngat pa talnganakutkut, a atai u ur purum kusun a kaklik, pa gong ulak ma u kas onoi.” 26A mot i kukuk pas, i gulen rakrakai tar a kaklik ning, pa i purum pas kusuni. A kaklik ning i arlar kama lara minat, pa galis la atongi mang ka mat. 27Ika e Iesu i tong pas a kuna kaklik, pa i dat atur pasi.
28Pa la kas uting na ning a rumai, pa anuna kakak a asasaer la deken kumnani mang, “I mangasa ning bel mila tolsot sur milar kepsen pas a mot kusuni?” 29E Iesu i keles la mang, “A ngas a mot larne ir purum ka ana nunung, bel ana ta utna otleng.”
E Iesu i warwara ulak ana nuna minat
(Mt 17:22-23; Lk 9:43-45)
30La han misaot, pa la han bolos utumo ana papar Galili. E Iesu bel i mang sur tik ir tasman a pukna ning lar kes ano, anasa i mang sur ir asaer anuna kakak a asasaerla. Pa i atongi mang, “Dir saran tar a Nat a Barsan uting na kuna taraila pa lar umkoli. Pa ning natola pukakiar ir rop ir laun ulak.” 32Bel la talapor ana kamkama warwara ne, pa la matmataut sur lar dekeni.Esining i leklek kol
(Mt 18:1-5; Lk 9:46-48)
33La hanot utumo Kapernaum. Pa ning la kas ana rumai, e Iesu i deken la mange, “Asa ning mulo arlak na warwara ono ting na ngas?” 34Ika bel la kelesi, anasa la arlak na warwara mang esi tan la i leklek kol. 35Pa e Iesu i kes pa i kabah pas anuna ning a bonot pa pisir naur a kakak a asasaerla, pa i atai la mange, “Ning tik i mang sur ir leklek kol, i wakak sur ir anatarna pasi, ir tena titol ka tetek a tarai rop.”36I los pas ning a kaklik, pa i atur potor tari tan la. Lamur i rawan pasi, pa i atai la mang, 37“Ning tik ir gasgas pas ta kaklik manglarne ana risak, i gasgas pas iau. Pa ning tik i gasgas pas iau, bel i gasgas pas iau ka, i gasgas pas esaning i sune iau ute.”
Esining bel i sairas dala, i nangan dala ka
(Lk 9:49-50)
38E Jon i atai e Iesu mange, “Tena Asaer, mila oroi ning a barsan i kepsen a motla ana risam, pa mila sairasi, anasa i bel tagun dala.” 39E Iesu i kelesi mange, “Gong mulo sairasi. Ning tik ir tol ta utna na kulkulan ana risak, bel ir atong kapit ta laulau a warwara hok. 40Anasa esining bel i sairas dala, i nangan dala ka. 41A atong momoli ta mulo, ning tik ir tabar mulo ana ta kap a malum, anasa mulo ane Karisito, ir los ot anuna arlou.A utna ning i ben rongon a taraila sur a toltol laulau
(Mt 18:6-9; Lk 17:1-2)
42“Tik ning i ben rongon ta hala kakakla ne ning i tortorot hok, ir laulau kol a warkurai teteki tana tik ning dir dot tar ta tnan hat ting na roana, pa dir migen amurungi sa latasi. 43Ning a kum i ben rongon u, ur kutus seni. Ir wakak ning ur kas ting na lalaun tikin a takumut ka, sur gong di migen u taum ana naur a kum rop uting na tnan iah ning bel ir mat. 45Ning a ham i ben rongon u, ur kutus seni. Ir wakak ning ur kas ting na lalaun tikin a takumut ka, sur gong di migen u taum ana naur a ham rop uting na tnan iah. ▼ 47Ning a matam i ben rongon u, ur lek seni. Ir wakak ning ur kas ana matanitu ane God taum ana takai a matam ka, sur gong di migen u taum ana naur a matam rop uting na tnan iah. 48Tingia‘a soisoila bel lar mat,
pa a iah otleng bel ir mat.’ b
49Dir atotoh a taraila rop ana iah arlar ana artabar tetek e God ning di atotohi ana sol. 50A sol i wakak, ika ning ka rop a makmakana, mulor amakmakan ulak pasi mangmangasa? Belal! I wakak sur a sol ir kes o mulo, pa mulor kes na balmolmol taum.”
Copyright information for
LBB